14 de abril 2025 – O vindeiro domingo 20 de abril, ás 10:30 da mañá, celebrarase unha nova xornada de ciencia cidadá no monte do Araño (Rianxo), promovida polo Laboratorio Ecosocial do Barbanza. O punto de encontro será o Campo da Festa do Araño, desde onde partirá a actividade.

A actividade está coordinada por Fundación Montescola coa colaboración da Comunidade do Monte Veciñal en Man Común do Araño, que apoia esta iniciativa de valorización e coñecemento do seu patrimonio natural.

Un Bioblitz é unha unha xornada de identificación participativa de biodiversidade na que persoas expertas e veciñanza colaboran para rexistrar o maior número posible de especies presentes nun espazo natural nun tempo limitado. A actividade contará cun grupo multidisciplinar de expertas en botánica, entomoloxía, ornitoloxía e micoloxía.

Está aberta a todos os públicos, sen necesidade de coñecementos previos, e pretende achegar a biodiversidade local á cidadanía. As persoas interesadas poden inscribirse até o venres 18 de abril, enviando un correo electrónico a info@montescola.org.

O monte do Araño atesoura zonas de moi alto valor ambiental, aínda pouco coñecidas, como o curso medio e alto do río Te e o seu val, onde se atopa o Pozo Bastón, ou o val que forma o rego do Muíño do Conde, espazos de gran interese ecolóxico e paisaxístico.