24 de marzo 2025 – Dentro do proxecto “Laboratorio Ecosocial do Barbanza. Un laboratorio vivo para a xestión multifuncional e a custodia colectiva do territorio” continúase coa labor de formación e sensibilización dirixida a técnicos, comunidades de montes e á poboación en xeral, cunha nova xornada demostrativa centrada na madeira e no seu aproveitamento sostible.

A cita será o sábado 29 de marzo na Casa Forestal de Baroña, en Porto do Son, que acollerá unha xornada centrada no sector da madeira. A programación permitirá ao público achegarse a este mundo, coñecer os seus procesos e comprender a importancia dun aproveitamento forestal que dea resposta ás necesidades de artesáns e profesionais vinculados ao sector.

Esta actividade forma parte da Acción 3 do proxecto do Laboratorio, que coordina a Plataforma pola Defensa do Monte, coa colaboración da Comunidade de Montes de Baroña, que pon á disposición o seu serradoiro portátil como ferramenta clave para a valorización da madeira de proximidade e a recuperación dun modelo de xestión forestal sostible. Ambas entidades están a colaborar para impulsar un futuro no que a madeira e a súa transformación contribúan ao desenvolvemento local baseado nos montes.

Un dos pratos fortes do evento será a participación da empresa Timber Tools, distribuidora oficial de Logosol, que se desprazará desde Valencia para ofrecer unha exhibición de maquinaria forestal, presentar as últimas novidades en serradoiros portátiles e ofrecer asesoramento técnico especializado, así como descontos exclusivos durante o evento. Haberá dous pases demostrativos, un ás 10:00 h para técnicos e profesionais e outro ás 16:00 h para o público xeral.

Ás 12:00 h dará comezo o faladoiro “do monte á industria”, no que profesionais do sector da madeira compartirán a súa experiencia e visión nun formato de intervencións breves, seguidas dunha rolda de preguntas aberta ao público. Trátase de promover o mantemento de coñecementos e prácticas tradicionais que, malia estaren en risco de desaparición, representan unha verdadeira economía verde e circular enraizada no territorio. Participarán:

• Francisco M. Romero González | Maderas Romero Cambeiro: empresa cunha traxectoria de máis de 60 anos na transformación de madeira e que actualmente elaboran palets. A súa visión achegará unha perspectiva industrial do sector madeireiro en Galicia.
• José Manuel Silva Ferreira | Silva Forestal: silvicultor e presidente da Comunidade de Montes de Xuño, con ampla experiencia na xestión e aproveitamento forestal comunitario. Representará a visión dos profesionais que traballan en servicios forestais (plantacións e limpezas) e compra e venta de madeira.
• Ramón Collazo Mosquera | Estaleiro Catoira de Rianxo: recoñecido carpinteiro de ribeira e presidente da Asociación Galega de Carpintería de Ribeira (AGALCARI). Promove o uso da madeira local na construción de embarcacións tradicionais, unindo tradición, cultura e innovación.
• Rodrigo Mosquera | TresOficios: artesán ebanista, especializado en deseño e elaboración de pezas únicas de madeira maciza. Defensor dos sistemas construtivos tradicionais, destaca tamén pola súa labor divulgativa a través de charlas e obradoiros.

Durante o evento, as persoas que asistan poderán desfrutar dunha zona gastronómica con opcións para petiscar e xantar. Así mesmo, haberá unha exposición de artesanía local, no que se poderá descubrir produtos únicos elaborados por profesionais da contorna.